Mwenyekiti Mtendaji wa IPP Dr Reginald Mengi amewataka vijana waache kushabikia rushwa kwa vile ni miongoni mwa vikwazo vya maendeleo yao.

Mwenyekiti Mtendaji wa IPP Dr Reginald Mengi amewataka vijana waache kushabikia rushwa kwa vile ni miongoni mwa vikwazo vya maendeleo yao.

Mwenyekiti Mtendaji wa IPP Dr Reginald Mengi ametoa nasaha hizo jijini Dar es salaam wakati wa hafla ya kuwatangaza na kuwazawadia washindi wa mwezi Mei wa shindano alilolianzisha la kutwiti wazo bora la biashara, ambapo zawadi ya kwanza ya shilingi milioni 10 imechukuliwa kwa pamoja na washiriki wawili;  Ombeni Sanga kutoka Iringa na Kelvin Laswai wa mjini Moshi.

 

Akiwazawadia shilingi milioni moja kila mmoja washindi wengine ambao twiti zao ziliingia kwenye 10 bora, Dr Mengi pia aliwahamasisha vijana wajiamini kuwa kwa kutumia fursa zinazowazunguka wanaweza kujikwamua kiuchumi kwa vile  kila mtu amezaliwa kuwa mshindi.

 

Ombeni Sanga alitoa wazo la kutengeneza kifaa kinachofundisha kama mwalimu kiitwacho boxpedia, na Kelvin Laswai alitoa wazo la kutengeneza jiko sanifu-biolite stove linalotumia kuni chache na lenye sehemu ya kuchaji simu na redio.

 

Mapema Jaji Mkuu wa shindano hilo Dr Donath Olomi na majaji wenzake Bi Maida Waziri na Dr Jabu Mwasha walisema jumla ya twita 6,800 zilipokelewa na kushindanishwa, na kuwataka watu wengi zaidi washiriki shindano hilo linalofikia kilele chake mwezi ujao.