Simba yamsajili Okwi Mpya

MARA ya kwanza Simba ilipomsajili, Emmanuel Okwi, aliitikisa sana ngome ya Yanga na kusababisha kila mechi ya watani wa jadi ilipokaribia mabeki wa Jangwani walikosa raha.

Hata hivyo, baadaye wakaanza kumwona wa kawaida ingawa bado amekuwa akiwaumiza kila timu hizo zinapokutana.

Baadaye Simba ikamsajili Amissi Tambwe na mwenyewe akawa moto kwa Yanga balaa, kila alipokutana nao walilala na viatu, Yanga ikafanya mambo ikamsajili Jangwani na sasa anacheka na nyavu.

Sasa Simba kwa mara nyingine imejibu mapigo kwa kumsainisha straika ambaye huenda ujio wake usipobuma kama Dan Ssserunkuma, Yanga watalazimika kupaki basi.

Mtihani mkubwa kwa Yanga utakuwa kwa mabeki Juma Abdul na Oscar Joshua wanaosimama pembeni huku katikati akisimama Kelvin Yondani na Nadir Haroub ‘Cannavaro’ kama kawaida huku langoni akisimama Ally Mustapha ‘Barthez’. Yanga inafikiria kununua kipa mwingine kutoka nje baada ya kutoridhishwa na ufanisi wa Benedicto Tinocco.

Ingawa safu hiyo imeonyesha umahiri katika siku za karibuni, lakini kwa aina ya uchezaji wa Laudit Mavugo ambaye ni msumbufu na mwenye uchu wa kupachika mabao watalazimika kutumia akili za ziada.

Hata Tambwe amekiri Mavugo wa Burundi ni noma ingawa amekiri kuwa yeye ndiye aliyemshauri asaini Simba.

“Simba ni timu nzuri sana ina wanachama na mashabiki wazuri, ila tatizo lipo kwa viongozi ambao wengi wanaonekana kuwa wababaishaji na kama wataendelea na ubabaishaji wao hawatafika popote, naamini Mavugo atawasaidia sana kwani ni mchezaji mzuri na anajitambua, atasumbua sana,” alisema Tambwe.

Mavugo ambaye ni mfungaji bora wa Ligi Kuu Burundi, amesaini mkataba wa miaka miwili Simba, anatua nchini akiwa na rekodi ya kufunga mabao 33 katika ligi ya kwao rekodi ambayo haijawahi kutokea Ligi Kuu Bara kwa zaidi ya nusu karne.

Si Tambwe wala Okwi ambao wameweza kufanya hivyo jambo ambalo linapandisha hadhi ya Mavugo.

Tambwe aliongeza: “Ni mzuri uwanjani hasa katika kazi yake ya kupachika mabao, ataisaidia Simba msimu ujao bora tu wamtumie vizuri.”

Straika huyo anatarajiwa kurejesha zama za Tambwe alipokuwa akiichezea Simba ambayo pia ilimsajili kutoka Vital ‘O ya Burundi na kufanikiwa kuibuka mfungaji bora katika msimu wake wa kwanza hapa nchini.

Mavugo anasajiliwa katika kikosi cha Simba ili kuiongezea nguvu safu ya ushambuliaji inayoundwa na Okwi, Ibrahim Ajibu, Elius Maguli na Mussa Hassan ‘Mgosi’ ambao wote ni mahiri wa mabao.

Mwanaspoti pia imebaini kuwa Mavugo amekuwa akiifanya timu pinzani kucheza chini muda mwingi hivyo Yanga inaweza kujikuta kiungo wake Said Juma Makapu akicheza zaidi kwa kukaba kuliko kupanda kutokana na uwezo mkubwa wa straika huyo katika kumiliki mpira.

Hata hivyo, rekodi ya kufungwa mabao machache msimu uliopita imeifanya Yanga kuwa na kiburi na safu yake ya ulinzi kutamba kuwa Mavugo hatakuwa na madhara kwao.

Beki ya Yanga kwa sasa imeongezewa nguvu ya Mwinyi Haji kutoka KMKM ya Zanzibar ambaye anamudu kucheza beki ya kushoto.

Yondani anatarajiwa kuendelea kuwepo katika nafasi ya beki wa kati licha ya mapendekezo ya kocha kuwa akatwe huku Cannavaro akitarajiwa kuongoza safu hiyo kumzuia Mavugo asiwe na madhara.