Bei ya Vyakula yapanda kutokana na upandishwaji wakodi za mafuta

Wasafarishaji na wafanyabiashara wamesema hawawezi kukwepa kupandisha bei za bidhaa na nauli kutokana na ongezeko la kodi ya mafuta ya Petrol na Disel katika bajeti iliyosomwa na serikali bungeni ya mwaka 2015-2016 huku wakitoa maoni ya nini kifanyike kuepuka bajeti kandamizi kwa wananchi.

Wakizungumza na ITV kwa nyakati tofauti jijini Dar es Salaam kiongozi wa chama cha wamiliki wa mabasi na msemaji wa chama cha wamiliki wa malori wamesema licha ya bei ya mafuta kuongezwa gharama lakini pia vipuri magari vimepanda bei baada ya dola kupanda kwani bidhaa hizo wanauziwa kwa dola na kuongeza kuwa kwa bajeti hiyo bado mwananchi wa kawaida ataendelea kuumia.

Kwa upande wa mwenyekiti wa umoja wa wafanyabiashara nchini Bw Johnson Minja amesema walitegemea serikali ingepanua wigo wa kuongeza idadi ya walipa kodi ikiwemo kurasimisha idadi kubwa ya biashara ambazo halipiwi kodi pamoja na kuweka mkazo maeneo ya uzalishji ikiwa ni pamoja na kuwabana wakwepa kodi badala ya kushughulika na maeneo yanayomgusa mwananchi wa kipato cha chini.

Badhi ya wanasiasa nao wamezungumzia bajeti hiyo ambayo wamedai kuwa wakati umefika kubuni vyanzo vipya vya mapato ambavyo vitampa unafuu mwananchi hasa kwa kutilia mkazo maeneo ya utalii na madini, lakini pia kuweka mfumo mzuri utakaowawezesha wakulima, wafugaji na wavuvi kulipa kodi kwa mapato wanayopata.