Blatter anaweza kuendela kuongoza FIFA

Rais wa Shirikisho la Soka Duniani FIFA Sepp Blatter aliyetangaza kujiuzulu anaweza kuomba kusalia katika wadhifa wake. Taarifa hizo ni kwa mujibu wa gazeti moja nchini Uswisi likinukuu chanzo kilicho karibu na Blatter ambacho hakikutaka jina lake litajwe . Taarifa hizi zinatolewa katika kipindi kisichozidi wiki mbili baada ya kiongozi huyo kutangaza kujiuzulu kuliongoza shirikisho hilo. Gazeti la kila Jumapili la Uswisi Die Schweiz am Sonntag linasema Blatter amepokea ujumbe wa kumuunga mkono kutoka kwa vyama vya soka vya Afrika na Asia, vikimuomba afikirie upya uamuzi wake wa kujiuzulu. Chanzo hicho kimesema Blatter amepokea vyema uungwaji mkono huo lakini bado hajafanya uamuzi wa kuendelea kubakia katika ofisi. Hata hivyo FIFA haijaweza kujibu mara moja barua pepe ya shirika la habari la Reuters kuhusu taarifa hizo.