Simba wamtamani Kim

MIONGONI mwa makocha waliokuwa wakitajwa kutua Simba ni pamoja na Kim Poulsen ambaye ni kocha wa zamani wa Taifa Stars, lakini sasa haitawezekana tena baada ya klabu yake ya Silkeborg IF kumgomea kuondoka na kumwongezea donge nono ambalo Simba hawawezi kumpa.

Baada ya kuona dili la kumleta Kim limeshindikana, vigogo hao wanaumiza kichwa kumpata mbadala wa Goran Kopunovic ambaye alitaka wampe Dola 50,000 sawa na Sh108 milioni jambo ambalo Simba waliligomea.

Hata hivyo, inadaiwa kuwa baada ya dili la Goran lililokuwa linampa jeuri la kutua Azam lilipogonga mwamba, aliondoka kwenda kwao Serbia na kutuma ujumbe wa kushusha dau hilo hadi dola 25,000 (Sh 54 milioni).

Imeelezwa kwamba matajiri wa Silkeborg IF wamemwambia Kim endapo angekuwa anatafutwa na timu ya Taifa wangekuwa tayari kumwachia lakini sio klabu ambayo pengine itashusha sifa yake kisoka.

Mpaka sasa viongozi wa Simba wanaendelea na mchakato wa kumpata kocha mwingine kwani hata kumrudisha Goran kumewagawa vigogo hao ambao wengine wapo tayari na wengine hawataki japokuwa inasemekana uwezekano wa kumrudisha ni mkubwa kutokana na changamoto wanayoipata ya kumpata kocha mwingine.

Wakati hayo yakiendelea ndani ya klabu hiyo kongwe nchini, imeelezwa kwamba uongozi utapangua kamati mbalimbali ambazo zimeonekana kushindwa kutekeleza majukumu yake ipasavyo.

Kiongozi mmoja wa juu wa Simba, aliliambia Mwanaspoti kuwa kamati iliyolegwa hasa ni Kamati ya Mashindano ambapo majukumu yao mengi yatapelekwa kwenye Kamati ya Ufundi iliyo chini ya Mwenyekiti wake, Collin Frisch ambaye kwasasa pia hupewa majukumu ya kusainisha mikataba kwa wachezaji wapya.

“Tumejifunza mengi msimu uliopita, ndio maana tunataka kufanya mambo yetu kwa umakini mkubwa, kuna vitu vitabadilika ambapo Kamati ya Mashindano haitakuwa na nguvu sana kwani kila kitu kwa asilimia kubwa kitasimamiwa na Kamati ya Ufundi inayofanyakazi kwa ukaribu mkubwa na benchi ya ufundi.

“Mchakato wa kocha bado unaendelea ingawa Goran baadaye aliomba kushuka bei ila viongozi tunabishana juu ya kumrejesha, hivyo suala lake pia halijapitishwa na huo mchakato mwingine bado unafanyiwa kazi, ujio wa Kim ni mgumu kwani hakuna fedha ya kumpa,” alisema kiongozi huyo.