Sinema ya Maliasili yatua bungeni

SERIKALI imebanwa itoe ufafanuzi wa utata uliojitokeza katika Wizara ya Maliasili na Utalii, baada ya Katibu Mkuu, Maimuna Tarishi kutengua uamuzi wa waziri wake, Lazaro Nyalandu na kuwarejesha kazini vigogo wa Idara ya Wanyamapori waliokuwa wameng’olewa.
Waziri Nyalandu aliwang’oa Mkurugenzi wa Wanyamapori, Profesa Alexander Sorongwa na Mkurugenzi Msaidizi wa Matumizi Endelevu ya Wanyamapori, Jafari Kidegesho, ikiwa ni sehemu ya utekelezaji wa azimio la Bunge la Desemba 22, mwaka jana.
Azimio hilo lilifikiwa baada ya Kamati ya Bunge ya Ardhi, Maliasili na Mazingira chini ya Mwenyekiti wake, James Lembeli, kuwasilisha ripoti ya utekelezaji wa Operesheni Tokomeza Ujangili na kuonyesha kuwa watendaji wa Maliasili, wakiwemo vigogo hao, walizembea hadi wananchi wakatendewa unyama na wengine kupoteza maisha na mali zao.
Bunge liliitaka serikali iwawajibishe watendaji wote waliozembea, akiwemo Prof. Sorongwa, ambaye alielezwa kuwa alitoa taarifa zisizo sahihi juu ya kuteswa kwa baadhi ya raia hao wema.
Hata hivyo, katika hali isiyokuwa ya kawaida, Katibu Mkuu, Tarishi, hivi karibuni kwa maelekezo ya Ikulu, alitengua uamuzi wa waziri wake na kuwarejesha vigogo hao kazini.
Mbunge wa Kilindi, Beatrice Shelukindo (CCM), aliibana serikali itoe kauli juu ya mgogoro unaoendelea katika wizara hiyo akidai umeibua utata mkubwa.
Akichangia hotoba ya bajeti ya Ofisi ya Waziri Mkuu kwa mwaka wa fedha 2014/2015 jana, Shellukindo alisema kuwa Waziri Nyalandu alimtimua Mkurugenzi wa Wanyamapori, lakini hivi karibuni mamlaka nyingine imemrejesha kazini katika mazingira yanayoibua maswali.
Shellukindo alisema kung’olewa kwa mkurugenzi huyo kulitokana na mapendekezo ya Azimio la Bunge lililobaini madudu katika Operesheni Tokomeza Ujangili.
“Mheshimiwa Spika, mkurugenzi aling’olewa kutokana na mapendekezo ya Bunge. Leo amerudishwa, basi hata Waziri wa Maliasili na Utalii aliyeng’olewa kwa sababu hiyo hiyo, naye arejeshwe,” alisema.
Kwa mujibu wa Shellukindo, wizara hiyo ni muhimili mkubwa wa pato la taifa, hivyo alimtaka Waziri Mkuu kutoa maelezo juu ya nini kinaendelea katika wizara hiyo.
Katika hatua nyingine, wabunge mbalimbali bila kujali itikadi zao, jana waliungana kutetea operesheni kamata vijana waendesha bodaboda ambao wamekuwa wakifanya kazi zao katika mazingira magumu katika miji mikubwa nchini.
Wabunge wa Mkoa wa Dar es Salaam ndio waliokuwa wa kwanza kuwasha moto kuwapigania bodaboda.
Mbunge wa Ilala, Mussa Zungu (CCM), alisema operesheni hiyo imekuwa ikiendeshwa kibabe na uonevu kwani hata walemavu wanakamatwa kwa kisingizio cha kusafisha jiji.
Zungu alisema kibaya zaidi vijana wanaokamatwa na bodaboda wamekuwa wakipigwa faini ya hadi sh 100,000 kwa makosa ya uonevu.
Abbas Mtevu, Mbunge wa Temeke (CCM), alisisitiza kuwa hakuna mbunge anayetaka uchafu, lakini jijini Dar es Salaam, wabunge hawakuwa na taarifa juu ya operesheni hiyo.
Mbunge wa Kinondoni, Idd Azzan (CCM), alisema kuwa Bunge lilifuta ushuru wa bodaboda ili waweze kupata faida, lakini faini wanazotozwa sasa zimesababisha biashara zao kuwa ngumu.
Godbless Lema, Mbunge wa Arusha Mjini (Chadema), alisema kuwa serikali ikiamua kuwaondoa wamachinga na bodaboda nchi itawaka moto.
Alisema kuwa kundi hilo likiondolewa mchana, usiku wataamua kufanya kazi nyingine na hakuna atakayepona.
Aliilaumu serikali kuwa tatizo la wamachinga ni kutokana na mipango dhahifu ya serikali ambayo imekuwa ikitegemea misaada kuendesha bajeti yake.