BUNGENI: Mrema ataka soko la mwika liboreshwe

HALMASHAURI ya Wilaya ya Moshi inaandaa mpango wa kuboresha soko la Mwika, ili liwe la kisasa na kuondoa athari za ajali katika eneo hilo.
Naibu Waziri, Ofisi ya Waziri Mkuu, Tawala za Mikoa na Serikali za Mitaa (TAMISEMI), Agrey Mwanri, alieleza hayo jana wakati akijibu swali la Mbunge wa Vunjo, Augustine Mrema (TLP), aliyetaka kujua mpango wa serikali wa kutafuta eneo kubwa na kuhamisha soko la Mwika kwa kuwa lipo barabarani, hivyo kuna hatari ya wananchi kugongwa na magari.
Akiendelea kujibu swali hilo, Mwanri alisema halmashauri hiyo imepanga kukopa fedha katika Bodi ya Mikopo katika serikali za mitaa, ili kutekeleza mpango huo.
Alisema kwa sasa halmashauri hiyo ipo katika hatua za upembuzi yakinifu wa eneo hilo ili kujua gharama zitakazohitajika kukamilisha kazi hiyo.
“Wakati mpango wa muda mrefu wa kuboresha soko hilo unaendelea, halmashauri imewasilisha maombi kwa Wakala wa Barabara (Tanroads) Mkoa wa Kilimanjaro ili iweze kuruhusu ziwekwe alama za tahadhari kwa maana ya kuonyesha maeneo ya kuvukia katika eneo hilo,” alisema Mwanri.
Alitoa wito kwa wananchi kuzingatia sheria za usalama barabarani ili kuepuka ajali zisizo za lazima.
Pia aliwataka wafanyabiashara kutumia maeneo yaliyotengwa kwa ajili ya biashara na kuacha kuweka bidhaa barabarani kwa ajili ya usalama wa mali zao.