Owino hatihati kuikacha simba msimu ujao

BEKI wa kimataifa wa Simba, Joseph Owino, amemtaka wazi kuwa anatafuta nafasi ya kucheza soka la kulipwa barani Ulaya na tayari klabu ya IB Vestmannaeyjar (IBV) ya Iceland anayocheza kipa wa zamani wa Simba, Abel Dhaira, imedhamiria kumchukua.

Owino ambaye ni raia wa Uganda, ameiambia Mwanaspoti kwa njia ya simu akiwa kwao akisema: "Nafikiri sasa ni muda mzuri wa kucheza soka la kulipwa Ulaya, nimekuwa na msimu mzuri nikiwa Simba, sasa naangalia mbele.

"Kiukweli kuna klabu imeonesha nia ya kunisajili na hii ni ile anayocheza rafiki yangu Dhaira, nafikiri wameshaona ninavyocheza na kilichobaki sasa ni hao kufanya mazungumzo na Simba.

"Naelewa kuwa nina mkataba na Simba na hivyo ninaomba iwapo Simba watafuatwa na klabu yoyote kwa ajili yangu wasisite kuwa radhi na pia wasiache kunishirikisha kwenye suala hilo."

Naye kocha wa IBV, Ragnar Eyjolfson, ameliambia Mwanaspoti kupitia mtandao wa kijamii wa 'Skype' akisema: "Ninamjua Owino, nilishawahi kutambulishwa kwake na Dhaira kipindi nilipoenda Uganda mwaka 2012.

"Nilizungumza naye kuhusu kucheza soka kwenye klabu yetu, ilikuwa mwaka 2012. Lakini kwa sasa siwezi kusema lolote, kama litakuwapo basi litawekwa wazi."

Katibu Mkuu wa Simba, Ezekiel Kamwaga, alisema: "Hatujapokea taarifa zozote kuhusu Owino kuhitajika na timu ya Ulaya, lakini kama timu inamhitaji inaruhusiwa kuja, tutazungumza kwa kuwa bado ana mkataba na Simba."

Dhaira naye alisema: "Ni kweli Owino ana mawasiliano na baadhi ya viongozi wa timu hii tangu siku nyingi, lakini sijajua iwapo amefanya mambo yanayohusu yeye kuhamia huku."